كتب الشاعر المبدع جمال زكي عينر قصيده بعنوان لجل الورد
( لجل الورد ) :
لجل الورد يهون الشوك
وانا مش عاشق ولا معشوق
اتعلمت أنا من صغري
أصول الود أصول الذوق
لو فاكر نفسك حترحرح
وِف كل مكان كده أو مطرح
حتقطَّع فيَّا تجيب سيرتي
أنا ساعة الجد أعرف اجَرَّح
شوك وردي حيطلع وينَّبِت
فوق جرحك يرسى ويتثبِّت
وارويه من نار ظلمك فيَّا
النار اللي آدِت فيا وشَبِّت
فابعد عن شوكي وعن وردي
لانا حاخد منك ولا حدٌِي
خلَّصت حنيني وأشواقي
دابت م الغدر حبال ودي
دابت من ظلمك والتجريح
تلميحك ليَّا ما كانش مريح
والكدب ووصف مهوش فيا
وده غير الغمز غير التلقيح
غيَّر في الحق أوي وزوَّر
بَدِل في كلامك واتحوَّر
الشمس مسيرها ف يوم تطلع
على أرضك والحق حيظهر
روح غني ولحَّن موالك
واشتكى للناس م اللي جرالك
الخلق اهي كلها عارفينك
عارفين مين عمك مين خالك
ما بقيتش الوردة اللي ف بالي
ولا ريحة عطرك تحلالي
ما بقيتش أتلهِف على قُربك
ولا عادش حيرخصلك غالي
شوك وردك خان وما عادش يهون
وانا وردي خلاص مش بيك مفتون
مش هاجي كتير أنا على نفسي
لو حتى مفيش غيرك في الكون
مش هاجي كتير انا على نفسي
لو حتى مفيش غيرك في الكون
بقلمي الشاعر جمال زكي عينر
تعليقات
إرسال تعليق