نشر الشاعر المبدع جمال زكي عينر قصيده بعنوان هديان السر
( هَديَان السِر ) :
هَديَان السِر ده رزق كبير
كان دعوة جميلة من امي زمان
لو يِهْدَى السر ويبقى ف بير
راح تحلى الدنيا نعيش في أمان
ساعة ما نجهِز واد أو بنت
حريصين ع المنظر والتزويق
ونواكب العصر بفيللا وقصر
ونعيش في وسع وِنحِس بديق
علشان في خلاف ونكد على طول
والعيشة مرار وخناق وزعيق
وجيران يسمعوا والأمر خطير
والسر خرج وما عادش ف بير
تجري على أبوها وهُوَّ كمان
على أمه بيجري كما النسوان
وبقوا فريقين بيحاربوا ف بعض
عملولهم قعدة ونصبوا صوان
وده عنده الحق وده غلطان
والحيطة يا ناس ليها ألف وِدان
ليه نعيش في فضايح وف جِرسَه ؟
والشمتان ليه نِدِيه فرصه ؟
سيبكم م الرايجة وموجة العصر
هَديَان السِر بمليون قصر
أيامكوا عيشوها ف راحة بال
وإفرشوا احلامكم فوق الحُصر
أيامكوا عيشوها ف راحة بال
وإفرشوا احلامكم فوق الحُصر
بقلمي الشاعر جمال زكي عينر
تعليقات
إرسال تعليق